სამცხე-ჯავახეთის გზის რეაბილიტაციის პროექტის მიზანია რეგიონში საგზაო-სატრანსპორტო ქსელის აღდგენა. საერთო ღირებულებით 203,5 მილიონი აშშ დოლარი, პროექტი ითვალისწინებს  დაახლოებით 223 კმ გზის რეაბილიტაციას ქვემო ქართლისა და სამცხე-ჯავახეთის რეგიონებში (იხ. რუკა).

გზის სამშენებლო-სარეაბილიტაციო სამუშაოებს ასრულებენ კონკურენტულ ტენდერში გამარჯვებული კომპანიები: „აშტრომ ინთერნეიშენელი" (ისრაელი), ერთობლივი საწარმო „პაპენბურგ/ბლექ სი ჯგუფი" (გერმანია-საქართველო), „აზერინშაათსერვისი" (აზერბაიჯანი) და „აკორდ ინშაათ სანეი” (აზერბაიჯანი).

სარეაბილიტაციო სამუშაოები ხორციელდება გზის შემდეგ მონაკვეთებზე: ფარცხისი-გოხნარი, გოხნარი-ნარდევანი, ნარდევანი-სათხე, სათხე-ნინოწმინდა-სომხეთის საზღვარი, ახალქალაქი-სულდა, ხერთვისი-ვარძია, სულდა-კარწახი-თურქეთის საზღვრის, თელეთი-კოდა-ასურეთის და ახალქალაქის შემოვლითი გზა.

სარეაბილიტაციო სამუშაოები 2008 წლის გაზაფხულზე დაიწყო და 2010 წლის ბოლოს დასრულდება.

სამცხე-ჯავახეთსა და ქვემო ქართლში გზის რეაბილიტაცია ხელს შეუწყობს ამ ორ რეგიონში სავაჭრო-სამეწარმეო საქმიანობის განვითარებას. რეაბილიტაციის შედეგად: 

• გაიზრდება საერთაშორისო და შიდა ვაჭრობა, შეიქმნება პირობები ბიზნესის განვითარებისთვის და კერძო ინვესტიციების მოზიდვისათვის, რაც ხელს შეუწყობს ახალი სამუშაო ადგილების შექმნას;
• ტურიზმისა და მასთან დაკავშირებული სხვა ეკონომიკური საქმიანობის განვითარებისთვის უკეთესი პირობები შეიქმნება სამცხე-ჯავახეთის რეგიონის მოსახლეობისათვის (დაახლოებით 250,000 მოსახლე);
• წარსულში იზოლირებული სამცხე-ჯავახეთი ადვილად დაუკავშირდება დანარჩენ საქართველოს, ეს კი ხელს შეუწყობს რეგიონის ეკონომიკურ ინტეგრაციას;
• ადგილობრივი მოსახლეობის მოთხოვნები განათლებასა და ჯანდაცვაზე უკეთ დაკმაყოფილდება.