6 მაისს, აშშ-ის ელჩმა საქართველოში ჯონ ბასმა და ათასწლეულის ფონდის აღმასრულებელმა დირექტორმა გიორგი აბდუშელიშვილმა, ათასწლეულის კორპორაციისა და სამშენებლო კომპანიის წარმომადგენლებთან ერთად ახალქალაქში განთავსებული „აზერინშაატსერვისის” სამშენებლო ბაზა მოინახულეს.

კონკურენტული ტენდერის გზით შერჩეული აზერბაიჯანული სამშენებლო კომპანია „აზერინშაათსერვისი" სარეაბილიტაციო სამუშაოებს ახორციელებს სულდა-კარწახი-თურქეთის საზღვრის (დაახლ. 16 კმ), თელეთი-კოდა-ასურეთის (დაახლ. 19 კმ) და ნარდევანი-სათხეს (დაახლ. 47,8 კმ) საგზაო მონაკვეთებზე. გზის სხვა მონაკვეთებზე, სამშენებლო-სარეაბილიტაციო სამუშაოებს ასრულებენ კომპანიები: ,,აშტრომ ინთერნეიშენელი" (ისრაელი), ერთობლივი საწარმო ,,პაპენბურგ/ბლექ სი ჯგუფი" (გერმანია-საქართველო) და ,,აკორდ ინშაატ სანეი" (აზერბაიჯანი).

სამშენებლო სამუშაოები ხორციელდება ათასწლეულის ფონდის სამცხე-ჯავახეთის გზის რეაბილიტაციის პროექტის ფარგლებში და ითვალისწინებს 223 კმ გზის რეაბილიტაციას ქვემო ქართლისა და სამცხე-ჯავახეთის რეგიონებში. ამჟამად გზის ყველა მონაკვეთზე ინტენსიურად მიმდინარეობს სამშენებლო სამუშაოები; ხდება გრუნტის სუსტი ადგილების გამაგრება, მიწის ვაკისის მოშანდაკება, ტკეპნა და ყინვაგამძლე მასალის ფენის მოწყობა.

***
სამცხე-ჯავახეთის გზის რეაბილიტაციის პროექტი (203,5 მლნ დოლარი) მიზნად ისახავს სამცხე-ჯავახეთისა და ქვემო ქართლის რეგიონებში საგზაო-სატრანსპორტო ქსელის აღდგენას. პროექტის განხორციელების შედეგად გაუმჯობესდება ამ რეგიონების სატრანსპორტო-საგზაო ქსელი, შეიქმნება უკეთესი პირობები ვაჭრობის, ტურიზმისა და სხვა ბიზნესის განვითარებისათვის. გზის რეაბილიტაცია ხელს შეუწყობს სამცხე-ჯავახეთისა და ქვემო ქართლის რეგიონების დაკავშირებას დანარჩენ საქართველოსთან, რაც თავის მხრივ ადგილობრივი მოსახლეობის სოციალურ, პოლიტიკურ და ეკონომიკურ ინტეგრაციას დააჩქარებს. სარეაბილიტაციო სამუშაოები 2010 წლის ბოლოს დასრულდება.

მშენებლობის დასრულების შემდეგ გზების მოვლა და შენახვა საქართველოს რეგიონული განვითარებისა და ინფრასტრუქტურის სამინისტროს საგზაო დეპარტამენტს დაევალება.